LA NEGATIVA DEL COMTE BORRELL IInd

Francesc Sangar.- L’emperaire Carlesmanhe aviá bastit a fins del sègle VIIIn un territòri frontalièr al sud dels Pirenèus que serviguèsse per neutralizar quin atac musulman que siá provenent de la Peninsula Iberica. Foguèt la nomenada Marca Ispanica.

Lèu Navarra e Aragon, mai aluenhats del reialme carolingian se separèron e creèron las siuenas pròprias monarquias, del temps que los comtats catalans demorèron jos la sobeiranetat de la cort dels successors de Carlesmanhe. Aquela creacion permet confirmar l’origina carolingiana (pas ispanica) de Catalonha, aluenhada de la nomenada “Reconquèsta” crestiana iniciada a la Sèrra Cantabrica de la Peninsula Iberica.

Vassals dels reis aquitans

Los comtes catalans èran vassals dels reis carolingians mas aquela dependéncia finalizèt l’an 988, quand lo comte Borrell II de Barcelona e d’Urgelh (filh de Riquilda de Tolosa, contunham de trobar de ligams entre la noblesa catalana e l’occitana), decidiguèt pas renovar lo sieu vassalhatge. Per quina causa ?

Los comtats catalans patissián de constantas atacas de las armadas musulmanas governats per Almansor. Lo comte Borrell II demandèt de divèrsas ajudas als reis (lo vassalatge implicava que lo sobeiran deviá ajudar als sieus vassals nòbles), mas la monarquia patissiá una crisi de succession de malaisida conclusion.

Lo rei Lotari moriguèt l’an 986 e just aprés lo sieu successor Loís V. Amb eles s’extinguissiá lo linhatge dels carolingians e arribava la nòva dinastia dels Capets. Lo cambiament dinastic provoquèt d’insurreccions e lo nòu monarca, Uc Ir Capet, podiá pas defendre e ajudar lo sieu vassal del sud dels Pirenèus.

Aquela abandon davant las atacas musulmanas provoquèt que lo comte Borrell IInd decidiguèsse pas renovar pas aquel vassalatge. Los comtats catalans venián sobeirans e començava un procès que creariá una nòva identitat amb lo temps, la catalana. Malgrat aquela pèrda efectiva, a França foguèt pas reconeguda aquela independéncia fins l’an 1255, amb lo Tractat de Corbeil, en regnant Jacme Ir lo Conquistaire a la Corona d’Aragon.

Fotografia principala: Garaigoikoa/CC.