LOS PRIMIÈRS VIKINGS

Christian Andreu.- L’istòria academica confirma que la nomenada edat vikinga comencèt en junh de l’an 793, quand un o divèrses vaissèls (drakkars) vikings assautèron lo monastèri situat a l’illa anglesa de Lindisfarne. Mas lo començament d’aquela epòca poiriá ara èsser situada fòrça mai temps endarrièr, pr’amor de la descobèrta arqueologica de dos vaissèls dels òmes del nòrd a l’illa estoniana de Saaremaa.

Per ansin, en 2008, una còla de trabalhaires d’una entrepresa electrica que trabalhava en la vila de Salme, Estònia, descobriguèt divèrses espleches metallics e rèstas d’un d’èsser uman que semblavan aperténer a un soldat de la Segonda Guèrra Mondiala. La suspresa foguèt granda quan Marge Konsa, arqueològ de l’Universitat de Tartu, confirmèt que tanben i avián d’espleches d’un periòde fòrça mai ancian.

La còla de Konsa excavèt e trapèt çò que semblavan èsser de rèstas de dos caissèls medievals. Amb mai de 275 claus de fèrre los arqueològs poguèren rebastir una longa nau de mai d’onze mètres de longor qiu’aperterniá a una edat anteriora a l’assaut de Lindisfarne, d’aperaquí 100 annadas abans. E la nau èra vikinga.

Una tròba unica

Los arqueològs poguèren confirmar lèu que la descobèrta èra unica e que podiá far istòria. Èra pas un vaissèl de pescaires mas una nau de guèrra. “Es long e estrech e plan leugièr, çò afirmèt Konsa. La tecnica del radiocarbòni demostrèt que foguèt bastit entre las annadas 650 e 700, fòrça abans de çò que seriá son darrièr viatge”.

Lo vaissèl trapat aviá pas cap vela e, per ansin, los òmes del nòrd que i aviá dins remèron al long de la còsta baltica fins a l’illa de Saaremaa. Ont moriguèron, pr’amor que los arqueològs trapèron dins lo pus long dels dos baissèls 33 òmes mòrts amb lors armas e animals.

Aital, lo vaissèl semblava èsser un luòc funerari per aqueles guerrièrs escandinaus que benlèu moriguèron totes apuèi una batalha que capitèt pas aprés una ataca a l’illa estoniana. Aquò situariá aquela batalha entre los ans 700 e 750, çò es gaireben cent ans abans del començament oficial de l’edat vikinga.

Lo periòde es estat conegut academicament fins a uèi coma l’edat de Vendel; un temps de transicion ont los viatges dels vikings èran brica longs. “Totes sèm d’acòrd que lo funeral d’aqueles òmes a una origina escandinava, çò confirmèt Konsa. Seriá quand comencèt vertadièrament l’edat vikinga”.

A mai dels centenats d’espleches escandinaus trobats suls vaissèls la còla d’arqueològs poguèt confirmar arqueologicament l’edat de set d’aqueles guerrièrs, trapats sul vaissèl mens long, qu’avián una edat que pòt èsser situada entre 18 e 45 ans. A mai d’aquò, trobèron de coltèls, d’òsses e divèrsas pèiras que lor foncion es pas encara coneguda.

Ambedos vaissèls èran l’un al costat de l’autre, dins un i avián 7 guerrièrs vikings mòrts e dins l’autre 33 òmes del nòrd. Ambedos vaissèls doncas serián la mòstra pus clara d’un cambiament tecnologic que se passèt pendent aquela epòca e que, en mai d’aquò, poiriá far rescriure totalament lo començament de l’edat vikinga pr’amor qu’aqueles guerrièrs trobats serián d’efièch los primièrs vikings, car aurián atacat l’illa de Saaremaaa.

Totun, que seriá pas fins fòrça puèi que los òmes del nòrd començarián a atacar las còstas d’Anglatèrra, Russia e America. Una epòca medievala qu’aguèt coma caracteristica principala l’ataca dels òmes del nòrd.