AL TORN DE ROBIN DELS BÒSQUES
Christian Andreu.- Maugrat que, segon la sciéncia istorica avança e mai e mai legendas son demostradas coma basadas en de faches reals, l’istòria del raubaire e arquièr Robin Hood contunha d’èsser una de las pus complèxas que i pòt aver encara dins l’istòria medievala anglesa. E aquò es aital pr’amor que desenats d’istorians assagèron de confirmar que Robert Hood o Robert Wood o Robin Hood existiguèt pas e jamai dengun poguèt o afirmar totalament.
I a desenats de luòcs situats entre las vilas de York e Nottingham qu’encara uèi son restacats a la figura del legendari arquièr. E de fònts escrichas medievalas ja ne parlan, aumens, dempuèi lo sègle XIII. Alara, existiguèt vertadièrament Robin Hood?
Robin Hood es uèi lo jorn considerat per la majoritat de l’academicisme istoriografic anglés coma un eròi legendari , plan bon arquièr e guerrièr que fugiguèt de la justícia del Sheriff de Nottingham e se n’anèt al Bòsc de Sherwood, ont luchèt pendent d’annadas contra los nòbles. De versions de la legenda mai actualas arriban a afirmar, pasmens, qu’auriá luchat en la crosada a Tèrra Santa e que, quand seriá tornat, auriá vist las sieunas tèrras raubadas pel quite sheriff.
Cal, totun, definir l’imatge pus anciana de Robin Hood per assajar de comprene quan e com nasquèt la legenda. Segon las versions mai ancianas èra un yeoman, çò es dire, qu’èra pas cavalièr nimai nòble mas que tanpauc èra cap paisan. La sieuna figura ja èra populara pendent l’edat medievala e i a plusors cançons que ne parlan des del sègle XV.
Un personatge istoric ?
L’istoricitat del personatges es pas encara cèrta. De desenats d’istorians o aimants de l’istòria assagèron de demostrar qu’existiguèt realament. Capitèron pas. D’un autre costat, desenats d’istorians tanben volguèron confirmar qu’es sonque una legenda. Poguèren pas. Aumens 8 personatges istorics (que son en de fònts escrichas medievalas) poirián èsser lo vertadièr Robin Hood, maugrat qu’en desparièra epòca e amb un autre nom.
D’efièch, semblariá èsser que, pendent l’Anglatèrra medievala, totes aqueles qu’èran en defòra de la lei èran nomenats tanben Robin Hood. Per ansin, qual es lo primièr còp que se’n parlèt ? La primièra referéncia al personatge de Robin Hood se trapa al poèma de Piers Plowman, escrich en 1370. Pasmens, la soleta copia que subrevisquèt fins a uèi lo jorn es d’aperaquí l’an 1450.
S’i parla d’un Robin Hood amic del pòble e las classas mai bassas, e qu’aima plan la Vièrge Maria, qu’es plan bon arquièr, qu’aima brica la Glèsia e qu’es un ferotge enemic del Sheriff de Nottinham. Lors amics Little John e Will tanben son amb el. Mas pas lo monge Tuck e Maid Mirian, qu’apareisseràn pas fins d’escriches posteriors.
E maugrat que lo vejaire, uèi lo jorn, es que demorèt pendent l’epòca del rei Joan sens Tèrra, fraire de Ricard Còr de Leon, las cançons medievalas pus ancianas parlan mai d’un rei Edoard (que seriá posterior). Pendent lo sègle XVI divèrsas òbras de teatre assagèron de demostrar la sieuna origina nòbla. L’istòria cambiarà mai e mai al long dels sègles fins la vision que n’avèm uèi lo jorn, en 2020.
L’istòria, los personatges, los amics, fins lo luòc ont demorèt cambiaràn tornarmai : es una istòria tras que complèxa. Qualqu’unes istorians confirman que son nom pus ancian foguèt Robert Hood mas qu’a l’epòca medievala Hood atanben voliá dire Wood, çò es bòsc e que Robin es un escais per dire Robert.
La legenda arribèt fins al sègle XIX e Walter Scott e Alexandre Dumas lo faguèron celèbre en defòra d’Anglatèrra. I a fins una tesi istorica que vòl demostrar que foguèt un dels òmes que luchèt amb Simon de Monfòrt a Occitània e que tornèt a Anglatèrra apuèi la sieuna mòrt. Una istòria que tanben a sens istoric pr’amor que Simon de Monfòrt veiguèt totas las sieunas tèrras e lo títol de Comte de Leicester confiscadas pel rei Joan sens Tèrra, enemic declarat del rei de França e aligat del Comte de Tolosa e lo rei d’Aragon. E cal pensar que la meteissa fin poiriá èsser aplicable a lors òmes en Anglatèrra.
En 1953 la Comission Mc Carthy estatsunitenca enebiguèt son nom als libres escolars car èra sinonim de comunisme. Puèi, l’istorian David Baldwin arribèt a identificar Robin Hood amb lo raubaire istoric Robert Goodberd, òme de Simon de Montfòrt filh e qu’auriá viscut fins l’an 1260.
Tròp luòcs legendaris
Uèi lo vejaire es que foguèt de York (maugrat l’imatge que donèt lo film de Disney de 1936, afirmava qu’èra de Nottingham). E i a una Fònt de Robin Hood pròcha al Bòsc de Sherwood e tanben un arbre en Edwinstone conegut coma l’Arbre de Robin Hood (qu’auriá pas pus de 800 ans totun). Los primièrs escriches, totun, daissan veire un dialècte de York que seriá ont foguèron escrits e pas en Nottingham (qu’es tanben una vila fòrça pròcha). E las primièras cançons parlan mai del Bòsc de Barnsdale (pròche al vilatge de Sherwood). Mas i a encara d’autres luòcs restacats a Robin Hood, coma la Glèisa de Santa Maria en York. Son totes tanben fruch de la legenda?
L’imatge mai drecha es que poiriá èsser que Robin Hood (escais donat a totes los raubaires que vivián al defòra de la lei anglesa) visquèsse al Bòsc de Barnsdale, al Sud de York, prèp de la frontièra amb Nottingham, e ont lo Sheriff de Nottingham tanben aviá jurisdiccion (e qu’aguèt de tèrras tanben en Loxley). Pr’aquò uèi York e Nottingham demandan ambedoas l’origina del personatge.
Dos son los candidats pus serioses. D’un costat Robert Fitzwater, que dirigiguèt la revòlta dels barons contra lo rei Joan sens Tèrra e que patiguèt l’exili e Robert Goodberd, que luchèt totun, contra Enric III al costat de Simon de Monfòrt filh, e pas lo paire. Fins ara cap istorian poguèt dire que foguèron pas Robin Hood. Dengun poguèt demostrar qu’existiguèt pas nimai qu’existiguèsse. Çò de mai segur es que foguèsse un escais, donat als raubaires. Mas tanben es possible qu’existiguèsse un Robin Hood original que visquèsse prèp de Sherwood e que foguèsse un arquièr perseguit per la lei quand tornava de l’estrangièr car auriá vist las sieunas tèrras confiscadas. Puèi, lo pòble li donèt d’amics e enemics, una epòca pus romantica e una tòca politica (lo retorn del rei Ricard). Aquò benlèu seriá pas real, mas l’existéncia de Robin Hood coma istorica, al long de sieis sègles poguèt pas encara èsser demostrada. Ne poguèren los istorians d’o negar fins ara. E de còps, las legendas son basadas sovent sus de faches reals.
