EN TOT DESMONTAR LO MITE
Christian Andreu.- Qualqu’unas biografias medievalas foguèron menadas a la legenda e lo mite. Pr’amor d’açò uèi son consideradas coma figuras gaireben divinas segon l’academicisme nacional de cada país. Una d’aquelas figuras pòt plan èsser, aisidament, la resulta de l’estudi de la vida e prètzfaches d’Alexandre Nevsky (1221-1263), considerat uèi a Russia coma un dels fondadors de la nacion russa.
Foguèt aital ? Alexandre Yaroslavich, conegut tanben coma Nevsky (que vòl dire “lo de Neva”) foguèt Prince de Novgorod demest 1236 e 1240 e tornarmai entre 1241 e 1256 e encara demest 1258-1259). A mai, foguèt Grand Prince de Kyiv entre 1236 e 1252 e, fin finala, Grand prince de Vladimir entre 1252 e 1263). E se foguèt prince de Novgorod, perqué es considerat coma un dels fondador de la nacion russa ? Sonque pr’amor que foguèt nomenat Grand Prince de Vladimir (que vòl dire segon l’istoriografia russa Prince entre Princes). Pasmens, foguèt coronat aital de la man del kan de l’Orda d’Aur mongòla, una poténcia estrangièra segon lo quite vejaire rus.
A mai d’aquò, divèrses episòdis de la vida d’Alexandre Nevsky pòdon pas lo situar coma un dels fondador de la nacion russa mas, benlèu, coma çò de contrari: segon fònts russes, en 1240 luchèt e ganhèt la batalha contra los suedeses prèp del flume Neva amb solament un pichon grop d’òmes d’armas. I a pas cap fònt escricha occidentala que confirme aquel fach. Se debanèt vertadierament aquela batalha? Èra l’armada suedesa giganta e pr’amor d’aquò los abitants de Novgorod considèran que i aguèt un miracle divin per ajudar Nevski?
La batalha del lac Peipus
L’acadèmia istorica russa actuala considèra que quand luchèt contra los cavalièrs germànics de l’Òrdre Teutonica en 1241 e los ganhèt sul glaç del lac Peipus tanben foguèt un prètzfach extraordinari. Es vertat que l’armada de Novgorod (e pas russa) luchèt contra una armada màger de cavalariá germànica (e sonque amb infantariá). E aquò ja es un miracle. Mas i aguèron de vertat tantes víctimes germanicas o la victòria dels de Novgorod patiguèt, amb los sègles, una cèrta exageracion brica istorica ?
Fin finala, Novgorod acceptèt d’èsser un estat vassal dels mongòls. Pr’amor de la voluntat de Nevsky. Quand la vila de Novgorod volguèt pas pagar lo tribut annadièr als mongòls Nevski obliguèt la populacion e la noblesa a lo pagar. Uèi, un fach coma aquel seriá considerat mai coma un acte de collaboracionisme que de nacionalisme patriòtic. Mas segon plusors istorians russes aquò se pòt perdonar pr’amor que Nevsky èra mai intelligent que los mongòls e sonque volia sauvar Russia (e pas Novgorod!) de l’ataca d’una poténcia estrangièra mai forta militarament.
La discussion demòra dubèrta. Cal benlèu tornar a estudiar la biografia de cèrtas personalitats istoricas medievalas ( coma la d’Alexandre Nevsky) pr’amor que, benlèu, foguèron mai umans 8e doncas amb mai defectes) que non lo retrach balhat (malurosament) encara uèi lo jorn per cèrtas escòlas istoricas europèas.
