LA COMTESSA DE LA MARCA
CAM.- Almodís, comtessa de la Marca (en lemosin La Marcha) es un bèl exemple de femna que demorèt reconeguda per l’istòria occitana e continentala medievala pr’amor de la sieuna administracion d’aquel comtat malgrat qu’aguèt un marit, Rogièr II de Montgommery, qu’aguèt tres còps mai de tèrras que non la sieuna femna. Totun, Rogièr II perdèt totas las tèrras apuèi jónher una revòlta de la noblesa contra lo monarca anglés Enric I e Almodís conservèt lo títol e lo comtat a Occitània.
Almodís I de la Marcha, mòrta en 1117, foguèt comtessa dempuèi l’an 1098 fins a la sieuna mòrt. Segon lo Chronicon sancti Mexentii Pictavensis, foguèt la filha del comte de la Marcha (una sòrta de territòri frontièra entre lo Ducat d’aquitània e lo Reialme de França), Adalbèrt II. Al còp, son fraire, Boson III, tanben foguèt comte de la Marcha. La sieuna maire podiá èsser estada Amelia de Montinhac o Amelia d’Aulnay o segon d’autras fònts Ermengarda de Corson.
Cossí siá, demorèt dins una còrt nòbla al long de tota sa vida. Benlèu pr’amor d’aquò maridèt Rogièr II (tresen filh del senhor de Montgommery, Comte d’Alençon e Shrewsbury e qu’aviá de tèrras a Saldforshire, Essex, Suffolk, Nottinghamshire, Derbyshire, Lincolshire, Hampshire e North Yorkshire e encara a Bowland.
Lo maridatge se passèt en 1090 e pauc aprés, en 1091, moriguèt a la batalha de Confolens lo fraire d’Almodís, Boson III, e aquesta venguèt la nòva comtessa de la Marcha. Totun, que l’oncle d’Almodís, Odon, governèt lo comtat aquitan fins a l’an 1098. Dempuèi aquel an, e amassa amb Rogièr II, Almodís venguèt la vertadièra comtessa de la Marcha.
En 1094 lo rei anglés envièt a Rogièr II a defensar lo castèl d’Argentan, a Normandia, atacat alavetz pel rei de França, Felip I. Lo sètge demorèt sonque un jorn (benlèu Rogièr aviá paur del monarca francés car la Marcha n’èra frontièra) e lo castèl foguèt perdut. Apuèi, calguèt encara pagar lo rescat. En 1102 s’amassèt a son fraire revoltat contra lo nòu rei anglés Enric I e perdèt totas las sieunas tèrras a Anglatèrra.
Una brava femna
A mai del govèrn del comtat de la Marcha, Almodís encara aguèt temps per donar tres filhs (Adalbèrt, comte de la Marcha), Boson e Odon e doas filhas (Poncia e Avís) a son marit. A mai, administrèt plan aquel comtat, nascut en 955 amb Boson I e qu’aviá sonque 80 quilomètres de tèrra e situat entre Auvèrnha, Peitieus, Engoleime, Berri e lo Lemosin – e que venguèt pas annexat pel rei de França fins a l’an 1531-.
Cossí siá lo nom d’Almodís de la Marcha demorèt dins l’istòria general d’Occitània del còp que Rogièr II venguèt un total desconegut. Semblariá èsser qu’aquò se passèt aital pr’amor de la conducha del comte de la Marcha, Rogièr: enebit de tornar a Anglatèrra des de 1102, auriá perdut l’interés a governar lo comtat de la Marcha dempuèi l’an 1109, car sonque es nomenat un còp als documents escrichs que ne son demorats de l’epòca.
La sieuna femna, Almodís, Comtessa de la Marcha, e lors filhs aguèron tota l’autoritat sus lo comtat. Qualqu’unas fònts encara confirman qu’Almodís aguèt una autra filha, Mata, que venguèt comtessa aprés la mòrt d’Almodís e aquò seriá estonant pr’amor que Rogièr II moriguèt pas fins aperaquí l’an 1140.
