LA SENHORA D’OLANDA
CAM.-La desconeissença de fòrça biografias medievalas contunha encara, uèi, lo jorn, d’èsser pro importanta. En Occitània pas gaires noms femenins, franc d’Alienòr d’Aquitània son coneguts. En d’autres païses, coma Catalonha, Almodís de la Marcha es benlèu un pauc coneguda mas pas d’un biais prigond. En d’autres païses, encara, coma los Païses Basses, i a tanben un dels noms pus importants de l’epòca medievala, malgrat la pauca informacion istorica que i a sus ela; Petronila de Lorrena (1182-1144). Petronila venguèt comtesa d’Olanda pendent una epòca clau pel país e son nom demorèt restacat a l’escasença de l’union politica amb Flandra. Un fach que, pasmens, capitèt pas politicament.
Per ansin, Petronila, nascuda Gertruda de Lorrena, nasquèt en 1082 e maridèt Florenci IInd, comte d’Olanda en l’an 1100. Foguèt alavetz quand cambièt lo nom –encara per de rasons pas claras – pel de Petronila. Malgrat lo maridatge, deguèt faciar una crisi istorica nacionala quand Florenci moriguèt en 1121 e calguèt dirigir lo país mentre lo sieu filh e eretièr, Teodoric Vien, èra encara pichon. Pr’amor d’açò venguèt regenta del país oficialament aumens fins a l’an 1129, (malgrat qu’o seriá fins a l’an 1133).
Divèrsas cronicas descrivon Petronila coma una femna autoritària e que sonque voliá mai e mai poder. Lo sieu govèrn sus Olanda foguèt descrich per mai d’un cronicaire medieval coma una epòca pas urosa pr’amor de son caractèr. Sonque dos ans aprés venir regenta d’Olanda donèt sosten militar al sieu fraire contra l’emperaire alemand e encara en 1127 menèt Olanda a una guèrra per aténher politicament lo poder del comtat de Flandra, que demorava sense eretièr.
Olanda en guèrra
Aital, Olanda dintrèt oficialament dins la guèrra de succession que se debanèt aprés la mòrt del comte de Flandra Baldoin VIIen. Per Petronila, lo sieu filh Teodoric aviá tot lo drech sul territòri vesin d’Olanda e demorèt en guèrra fins que lo comtat de Flandra venguèt, fin finala, a mans de Carles lo Bon.
Segon la Cronica d’Edmond caliá abandonar la regéncia en 1129, mas Petronilla encara aguèt tot lo poder sus Olanda encara fins a l’an 1133. Justament aquel an lo fraire pichon de Teodoric, Florenci lo Negre, demandèt d’èsser nomenat Comte d’Olanda. Calguèt l’intervencion mairala per defensar lo drech de l’ainat encara fins a 1133, que se debanèt aprés balhar la rason primièr a Florenci.
D’un autre costat, Petronila tanben es uèi coneguda coma fondadora de l’abadiá de Rinjnsborg en 1133. Justament foguèt aquela abadiá ont Petronila, benlèu fatigada del poder, decidiguèt se retirar e demorar fins a la fin de la siá vida, aperaquí dètz ans puèi. Foguèt ailà sepelida e doblidada per l’istòria medievala fins a la fin del sègle XX, quand la siá figura comencèt a èsser tornarmai remembrada als Païses Basses per l’istòria oficiala d’aquel país.
Uèi es considerada totun, urosament, un dels personatges màgers d’aquela epòca, malgrat son caractèr. Que, benlèu tanben un jorn tanben poiriá cambiar car la misoginia contemporanèa medievala acceptèt d’un biais plan marrit de femnas al poder. E lo cas de Petronila d’Olanda seriá un mai d’una lista de personatges femenins que l’istòria medievala actuala poiriá recuperar amb d’estudis mai prigonds sus la siá epòca en Olanda.
