TRES TRENCAVÈLS ; TRES EVESQUES

Francesc Sangar.- Aton II nasquèt aperaquí l’an 905 e èra filh de Bernat Aton I, vicari d’Alzona e vescomte d’Albi. Eretèt de son paire lo meteis vescomtat, mas tanben de tèrras al torn de d’Ambialet, fòrça pròchas a Albi, que venguèron tanben una autra senhoriá feudala (en qualcun moment aquel senhoriá foguèt transformada tanben en vescomtat).

Maridèt Diafronissa N. (del nom de familha de la siá femna coneissèm solament la letra iniciala; la siá filiacion o origina de la siá familha son desconegudas). Lors filhs foguèron Adelaida d’Albi, Bernat Aton II, que contunhèt amb lo linhatge, e Frotari, qui venguèt evesque de Caors, en seguint la tradicion de la vocacion religiosa dels filhs segonds (pas eretièrs). Aton II moriguèt aperaquí l’an 958 e foguèt succedit pel sieu filh Bernat Aton II, nascut l’an 945.

En qualqu’unas escasenças los istorians comentan qu’unes dels succèsses de la familha Trencavèl foguèron las siás alianças matrimonialas. E lo cas de Bernat Aton II es evident; maridèt la vescomtessa Ganciana de Nimes, e dempuèi d’aquel moment la familha governèt aquel segond vescomtat. La familha establiguèt la siá residéncia abituala a la vila de Nimes. Lo domeni de la futura familha Trencavèl començava a incrementar la siá estenduda.

Tres filhs mai

Bernat Aton II aguèt tres filhs. Un autre Frotari que foguèt evesque, justament de Nimes (e es ja lo tresen evesque Frotari de la familha), e que moriguèt l’an 1014. Èra costuma que las familhas de la noblesa situèsson lors filhs amb vocacion religiosa en cargas importantas dins de la Glèisa Catolica, fòrça abitualament dins la meteissa diocèsi. Tanben aguèt una filha, Ermengarda, que maridèt Bernat I, senhor d’Andusa. E un autre filh, Aton III, nascut a Nimes aperaquí l’an 975, e que contunhèt amb lo linhatge.

Bernat Aton II moriguèt aperaquí l’an 984.  Aton III maridèt Gerberga NN (amb filiacion desconeguda tanben coma Diafronissa) e aguèron tres filhs. Bernat Aton III (l’eretièr), Elisabet de Nimes, que maridèt lo comte Ramon Berenguer I de Barcelona e provoquèt un dels ligams abituals en aquela epòca medievala entre la noblesa catalana e occitana. E lo tresen filh foguèt Frotari, e devinatz quina foguèt la siá profession? Òc, evesque de Nimes. E es lo quatren de la familha (en un anterior article parlèrem del primièr). Se un òme naissiá en aquela familha e recebiá coma nom Frotari, ja sabiá quina seriá lo sieu futur mestièr.

Dempuèi d’aquela generacion d’Aton III coneissèm ja datas mai drechas sus las siás mòrts sustot. Aton III moriguèt a Albi l’an 1032, e lo sieu filh l’evesque Frotari de Nimes l’an 1077. De las vidas d’aquelas tres generacions de Trencavèl coneissèm pas practicament cap d’eveniment significatiu. Solament la data de naissença, de mòrt, los noms de lors femnas e lors filhs. Son temps encara tròp ancians perqué las cronicas reculhiguèsson fòrça actes istorics de soslinhar. Cossí auretz vist, los noms dels membres masculins de la familha se repetisson tornarmai. Pels cercaires de genealogias serà estat un trabalh fòrça malaisit establir las filiacions e las relacions dels desparièrs personatges istorics…