LOS LIBRES DEL KOJIKI

Christian Andreu.- Aprene perqué las societats actualas tanben son diferentas unas d’autras es un prètzfach digne d’un estudi prigond pels cercaires de l’edat medievala. E ne trapar la causa ne pòt èsser tanben una suspresa estonanta. Per ansin, perqué Japon a aquela cultura tan singulara uèi lo jorn ? Aquò a plusors causas (comas totas las autras societats), mas trapar de joièls literàris e istorics plan ancians, coma los libres del Kojiki, pòdon ajudar e plan a comprene melhor la idiosincrasia d’aquela nacion medievala.

Los tres libres del Kojiki foguèron escriches per l’escrivan Yasumuro en l’an 712 e la tòca que l’autor aviá èra pas autra qu’ajudar a consolidar una nòva dinastia imperiala. La causa primièra, doncas, èra d’ajudar l’emperatritz Genmio (708-714) e los Kojiki foguèron, a l’origina, d’òbras al servici de l’ostal imperial japonés.

Los libres del Kojiki, maugrat qu’editats pas fins a l’an 1644, son una òbra màger japonesa que vòl explicar cossí se debanèron las causas anticas al Japon abans d’aquela emperairitz. L’autor, Yasumuro, de l’ostal dels Oho, èra al servici de la còrt, e un dels sieus ancessors tanben èra estat emperaire del Japon.

L’òbra Kokiji son los libres d’istòria pus ancians de Japon e foguèron escriches pr’amor del desir d’un autre emperaire, Tenmu, que voliá adobar lo problèma d’aver d’epòcas anterioras pas claras pendent los tempses pus antics. Uèi es un vertadièr joièl nacional medieval japonés. Foguèt escrich en kanji chineses, qu’encara uèi son malaisits de comprene per un japonés actual.

L’origina del Japon

Pasmens, los tres libres del Kojiki vòlon descriure quina èra la vertadièra origina del govèrn imperial del Japon e cossí se debanèt l’istòria pus anciana dels primièrs emperaires d’aquel país. Pr’açò far arriba fins al cèl, car segon los japoneses, l’emperaire del Japon es aital pr’amor que los dieuses del cèl ansin o volguèron.

Lo primièr libre parla dels mites de l’origina del cèl e la tèrra, los dieuses e tot çò que faguèron e cossí nasquèron las illas niponas. Los libres segond e tresen parlan dels primièrs 33 sobeirans qu’aguèt Japon dempuèi Jinmu Tenno fins a l’emperairitz Suiko, al sègle VII.

Quand foguèt escrich lo Kojiki en l’an 712, los japoneses justament avián una nòva capitala, Nara, que comencèt tanben una nòva epòca ; l’edat de Nara medievala, qu’amassa amb d’autras (Heian, Kamakura, Muromachi e Monoyama) son consideradas uèi coma totalament medievalas. E aquò qu’uèi lo jorn encara es discutit fins a quand arribèt l’edat medievala al Japon pr’amor que la cronologia tecnologica, sociala e politica d’aquel país es pro singulara e, de còps, pòt pas èsser totalament restacada amb la d’autras nacions. Nara foguèt, cossí que siá, fondada l’an 710, e caliá legitimar la nòva edat, capital e dinastia japonesas.

Pr’açò far Yasumaro sovent barrejèt mite e istòria. Mas tanben i an d’anticas cançons e poesias d’epòcas anterioras de divèrsas províncias o encara del continent que fan del Kojiki un estonant joièl medieval japonés. E que tanben demòstra l’avanç social d’una societat medievala japonesa que, sovent, pòt brica èsser restacada amb l’europèa omonima, pr’amor de la fauta d’òbras o de qualitat dels libres de la meteissa epòca continentala medievala europèa.