LO SÈTGE DE CABARET (1211)
CAM.-Lo sètge del castèl de Cabaret, tanben conegut coma sètge de Las Tors (pr’amor qu’èran una amassada de tres castèls, Cabaret, Flor d’Espina e Quertinhós, apertenents als senhors de Cabaret, Pèire Rogièr e son fraire Jordan) foguèt un dels darrièrs episòdis de l’estapa de la crosada contra los bonsòmes o catars de 1209. Aparavan la dintrada a la Montanha Negra e pr’açò èran una tòca essenciala pels crosats.
Los tres castèls dels Cabaret doncas (lo quatren, Tor Regina, foguèt bastit per òrdre reiala aprés la crosada per mostrar lo poder de França) èran propietat d’aquela familha occitana dempuèi, aumens, lo sègle XI. Foguèron tanben un luòc clau per s’amassar per la comunautat dels bonsòmes e ne demòra testimòni escrich de la preséncia als castèls de tres prefectes catars, Arnaud Hot, Pèire Isarn e Guiraud Abith.
Aprés la mòrt de Raimond Rogièr de Carcassona, vescomte del territòri e sobeiran del meteis en nom de Pèire I, comte de Barcelona e rei d’Aragon, los fraires Cabaret decidisson atacar los crosats e demorar aliats de l’ostal de Barcelona. Foguèt alara, en novembre de 1209 – Raimond Rogièr moriguèt en preson lo 10 de novembre d’aquel an – quand Pèire Rogièr de Cabaret ataca un comboi crosat dirigit per Bouchard de Marly, a l’epòca senhor del castèl de Saissac. Marly serà enviat a la preson del castèl de Cabaret del còp qu’un autre cavalièr occitan aliat, Giraut de Pepius, conquistèt lo castèl de Puègserguier.
La familha de Monfòrt
L’accion es considerada coma plan grèva per Monfòrt. Marly es son cosin. Decidís atacar directament Las Tors mas a pas pro d’òmes e déu quitar lo sètge. Profiecha per atacar lo castèl de Tèrme e lo conquistar. Puèi encara atacarà e conquistarà Fanjaus e Bram. En Bram daissa cècs cent occitans que son enviats a Cabaret. Un embornhat ne serà lor guida. Aquò provoca una prigonda pensada en Pèire Rogièr de Cabaret. El e son fraire son los darrièrs de la resisténcia en Aude e pòdon pas resistir gaire temps quora arriban los crosats.
Pr’açò, pendent la fin de 1210 o començament de 1211 (la data es pas segura) Pèire Rogièr de Cabaret e son fraire Jordan abandonan los castèls de Las Tors que sonque poiràn recuperar en 1223, aprés la mòrt de Monfòrt. Dempuèi alavetz, tornèron a venir un nuclèu importanta per la comunautat dels bons òmes. E aquò serà aital fins a 1229. D’efièch, lo senescal Umbert de Beaujeu atacarà tornarmai los castèls en 1227. Aquel periòde es conegut coma la Guèrra de Cabaret (1227-1229). Aprés la sieuna conquista finala los franceses destrusisson los tres castèls e fan bastir puèi lo castèl de Tor Regina.
Suls principals protagonistas occitans d’aquels castèls catars òm coneis pas res ni quand naissèron nimai la sieuna mòrt. Pasmens, es plan possible que venguèsson cavalièrs faidits coma centenars d’autres cavalièrs e senhor feudals occitans que patiguèron plan dempuèi lo començament de la crosada dels albigeses de 1209. E coma lo pòble occitan, catar i catolic.
