“BOGRE. LA GRANDA ERETGIA EUROPÈA” A SANT MATEU

Francesc Sangar.- Lo passat dissabte 8 d’Abril, a Sant Mateu, a la comarca valenciana del Maestrat, foguèt projectat lo film “BOGRE. LA GRANDA ERETGIA EUROPÈA” del director piemontés Fredo Valla, dins d’una jornada consacrada a la recuperacion de la memòria istorica del movement dels Bons Òmes e las Bonas Femnas, lo Catarisme. La jornada foguèt organizada per l’associacion culturala e toristica CAMINS DEL MAESTRAT, amb la collaboracion de la COMUNA DE SANT MATEU.

Parlam d’una dissidéncia crestiana dels sègles XIIn al XIVn, que patiguèt una granda repression a comptar de l’an 1209. Las darrièras comunitats cataras s’establiguèron en fugent d’aquelas persecucions al Maestrat.

L’argument del film mòstra un viatge del director, qu’entrevista divèrses intellectuals contemporanèus del Catarisme, e qu’ofrisson una vision conjoncha de totes los aspèctes d’aquel movement, e manten las lengas originalas dels desparièrs estudioses, lo francés, l’occitan, lo sèrbocroat, lo bulgar e l’italian. Lo sieu director, de lenga familhala occitana, es totjorn estat un grand defensor de la diversitat lingüistica europèa.

Lo film a Sant Matèu del Maestrat

La pellicula, exibida al Cinèma Stromboli de Sant Mateu, foguèt presentada per José Luís Soler, promotor del projècte dels CAMINS DELS CATARS, que defend la creacion d’un Itinerari Cultural Europèu qu’amasse las tèrras del Maestrat amb las del Lengadòc, ont s’establiguèt lo nuclèu principal del Catarisme, e per Francesc Sangar, president de l’ASSOCIACION D’AMICS DE LA SAPIÉNCIA OCCITANA.

Pendent lo jorn, foguèt tanben mostrada al Palai Villores una exposicion de pintura de Tomàs Segarra e Marian Salas amb lo títol “Camins dels Catars e l’abitud” e foguèt presentat lo libre “Guillem de Belibaste, el cátaro” escrich per l’escrivan Eduardo Ferreres.