L’AUTRE CHAUCER
CAM.- Maugrat que plan mens conegut que Chaucer, John Gower (1330 – 1408) foguèt un dels poètas e escrivans angleses pus importants de l’edat medievala. Foguèt contemporanèu de Langland e tanben del Poèta de Gawain, e tanplan bon amic del meteis Geofrey Chaucer.
Gower es encara uèi rebrembat per de grandas òbras com lo Mirour de l’Omme, Vox Clamantis o encara la Confessio Amantis. Son tres long poemas escriches en latin, francés e anglés. La tematica comuna causida per l’autor en aqueles poemas son la moral e la politica.
Los primièrs ans de la vida de Gower son brica coneguts. Çò de mai segur es qu’arribèsse al mond dins una familha proprietària de tèrras de Kent e Suffolk. Segon los cercaires Stanley e Smith visquèt entre ambedoas regions anglesas. D’autres expèrts uèi afirman que Gower demorèt fòrça temps a l’ora de legir la Bíblia, a mai d’autres autors coma Ovidi o encara Joan de Salesbury.
Segon la Confessio Amantis un còp trapèt lo meteis duc d’Aquitània e rei anglés Ricard IInd. Aital, lo rei auriá parlat amb Gower pendent un temps sus una barca al flume Tamèsi. La tròba se seriá debanada aperaquí l’an 1385. Après aquò lo rei auriá demanat al poèta d’escriure la Confessio Amantis. Pasmens, Gower tanben dediquèt lo libre puèi al rei Enric IVn.
Una vida misteriosa
Mai d’una estapa de la vida de Gower contunha uèi d’èsser un mistèri. Segon qualcunes expèrts poiriá aver estudiat drech a Londres. Segon Macaulay foguèt un vendedor de lana. Pasmens, en 1365 recebèt dètz liuras per l’arrendament d’un ostal de Essex. Puèi encara recebèt tanben d’argent per l’arrendament d’autres ostals a Norfolks e Suffolk. En 1399 Enric IVn li autregèt una pension basada en vin de Gasconha fins a la sieuna mòrt.
Totun, i a mai fònts istoricas que demòstran que Gower foguèt amic de Chaucer. Un plan bon amic. Quora Chaucer viatjèt a Itàlia en 1378 Gower demorèt en Anglatèrra coma majordom dels sieus afars. Chaucer dediquèt lo poèma Troilus e Criseyde a Gower e aquel parlèt plan ben de Chaucer al libre Confesio Amantis.
Aperaquí l’an 1378 Gower maridèt Agnes Groundolf e se pensa que dempuèi l’an 1400 demorèt cèc. Quora moriguèt en 1408 foguèt sepelit a la Catedrala de Southwark. Segon los cercaires la poesia de Gower foguèt de tipe religiosa mas tanben politica, istorica e sustot morala. Fòrça còps usèt l’allegoria. Los primièrs tèxtes de Gower foguèron de cançons escrichas en anglonormand. D’aquela epòca sonque es demorat lo libre Speculum Meditantis, tanben conegut coma Mirour de l’Omme, un poèma de mai de 30.000 linhas que parla totjorn de moral. Segon semblariá la tòca èra balhar d’idèas a la cort anglesa e aquitana.
La segonda màger òbra de Gower foguèt lo libre Vox Clamantis, escrich en latin. Uèi es considerat coma una allegoria de la revòlta dels paisans angleses. Gower causís los aritocratas coma partit e demana, coma Walworth, la fin totala dels revoltats. Totun, tanben critica la politica marrida del rei Ricard IInd.
Lo libre Confessio Amantis tanben es un long poèma, escrich en anglés. La tematica tanben es sus la moral. Segon mai d’un expèrt, Gower venguèt celèbre pr’amor d’aqueste libre. Totun, mai d’un expèrt certifiquèt que l’òbra de Gower es un contunh sus la filosofia e la moral de l’epòca.
Lo vejaire de Gower sus la Virtut, la Justícia e lo Rei son doncas, plan originalas. La siá òbra descriu lo pecat e la sieuna origina e, cossí es de besonh aver una lei sociala universala e cossí lo monarca déu demorar coma arbitre d’angleses e aquitans. Gower tanben publiquèt, a mai d’aquelas tres òbra màgers, d’autres libres dont Cinkante Ballades (en francés) lo poèma In Praise of Peace e divèrses poèmas en latin dedicats al rei Enric IVn.
La poesia de Gower es estada valorada amb vision critica. Al sègle XVIn foguèt considerat lo paire de la poesia anglesa, al costat de Chaucer. Dempuèi lo sègle XVIIIn, totun, la sieuna fama venguèt mendre. E dempuèi 1901 es tornat e èsser mai valorat e considerat. Pasmens, uèi s’estima que la sieuna poesia a pas lo nivèl de Chaucer.
Segon Fisher, Gower e Chaucer foguèron vesins e aprenguèron de modèls italians nòus al còp, e dempuèi 1376 venguèron mai critics e serioses. Gower sonque comencèt a escriure en anglés après la sortida del libre Troilus e Criseyde de Chaucer en anglés (un grand succés a l’epòca).
A mai d’aquelas òbras Gower tanben escriguèt, abans de morir, la Cronica tripertita (aperaquí 1400). Puèi sembla que perdèt l’amistat amb Chaucer e venguèt cèc. E maugrat que la sieuna poesia uèi es pas classada al meteis nivèl que la de Chaucer, òm pòt l’agachar coma un dels pòetas màgers angleses del sègle XIVn e de tota l’edat mediavala per drech pròpi. Que siá desconegut vòl pas dire totjorn una mendre qualitat, malgrat escriure en tres lengas (e benlèu pr’açò uèi es pas pus classat coma paire de la lenga anglesa medieval. Aquel títol contunha d’èsser proprietat exclusiva del sieu estimat amic – e vesin – Geoffrey Chaucer.
