DE VARIÒLA AL JAPON MEDIEVAL

CAM.- Japon visquèt una grèva epidèmia de variòla al sègle VIII que provoquèt la mòrt de mai d’una tresena part (aperaquí un milion de personas) de la populacion del país. Las consequéncias socialas, economicas e religiosas demorèron sègles, car, a diferéncia de China (amb 50 milions d’abitants) Japon, a l’epòca, sonque aviá un pauc mai de tres milions d’abitants.

L’epidemia es uèi coneguda coma l’epidèmia de Tenpio e se desvolopèt al Japon entre los ans 735 e 737. Pas gaire abans, la còrt japonesa aviá adoptat un registre per de nòvas malautiás. Es pr’açò qu’uèi coneissèm aquela epidemia. La causa ne serián los contactes de mai en mai comuns entre la populacion japonesa e l’exterior.

 Lo començament de l’epidèmia

L’an 735 la variòla èra plan espandida per las vilas de Dazaifu e Fukuoka, al nòrd de l’illa de Kyushu. Semblariá qu’un pescador de Dazaifu, e qu’aviá patit un naufragi a Corèa, aviá menat la malautiá al Japon. L’espandida de la malautiá se debanèt plan lèu per tot lo nòrd del país e aperaquí l’an 736 ja i aviá fòrça proprietàris de tèrras que recolhián pas la colhita, çò qu’entraïnèt, a mai de l’epidèmia, una granda famina.

Divèrsas cronicas japonesas medievalas confirman un viatge d’un grop de foncionaris al nòrd de Kyushu que puèi tornèt a Nara, la capitala. Amb eles la malautiá s’epandiguèt a l’èst de Japon.  La variòla s’espandiguèt puèi per tot Japon pendent l’an 737. La situacion venguèt plan grèva pr’amor de la nauta mortalitat e calguèt arrestar los impòstes a totes los japoneses. ​

Uèi òm pensa qu’aquela epidèmia de variòla entraïnèt la mòrt d’entre un 25% e un 35% de tota la populacion japonesa. Cèrts airals patiguèron una mortalitat encara pus nauta. E tanben la noblesa ne patiguèt las consequéncias, car plan importantas figuras governamentalas coma los fraires Fujiwara tanplan moriguèron per variòla en l’an 737.

L’agricultura demorèt plan afectada. Mai que mai lo ris. Per tornar a una renaissença de la populacion, los nòbles japoneses arrestèron temporalament los impòstes. Encara annadas puèi lo govèrn japonés balhava de tèrras sens pagar res sonque amb la condicion de las dedicar a l’agricultura. Mas pas gaire japoneses podián alara las trabalhar.

D’un autre costat, l’emperaire Shomu demanèt la bastida del grand temple bodista de Todai-ji a mai del de Daibutsu. Bastir lo temple de Daibutsu foguèt plan car e provoquèt una situacion economica plan grèva. ​

Japon patiguèt tanben d’autras epidèmias de variòla. Totun, plusors cercaires afirman que, aprés l’an 1000, la variòla venguèt endemica en Japon. Açò entraïnèt que quora i aguèt de nòvas ondadas de la malautiá aquelas foguèssen pas tan mortalas.