DE CATARISME A SANT MATEU, AL MAESTRAT VALENCIAN
Francesc Sangar.-Contunha la recuperacion de la Memòria Istorica dels Bons Òmes e las Bonas Femnas a las tèrras valencianas. Lo passat dissabte 30 de març a Sant Mateu, a la comarca del Maestrat, foguèt exibit lo film “BOGRE, LA GRANDA ERETGIA EUROPÈA” del director piemontés FREDO VALLA, amb fòrça d’interès pel públic e amb l’organizacion de l’ASSOCIACION CULTURALA E TORISTICA CAMINS DEL MAESTRAT – SANT MATEU. En finir la projeccion del film, divèrses assistents demandèron informacion sul Catarisme a JOSÉ LUÍS SOLER, de l’entrepresa SERVITUR e de l’associacion CAMINS DELS CÀTARS e grand estudiós d’aquel capítol de la nòstra istòria.
E perqué lo Maestrat valencian? Pr’amor que dins aquela comarca existiguèron las darrièras comunautats de Bons Òmes e Bonas Femnas, ont avián emigrat fòrça occitans en cercar un emplaçament segur ont poder viure la sieuna fe, en fugir de las persecucions contra los “eretges” que massacravan las tèrras occitanas.
Lo darrièr perfièch catar
Lo darrièr Perfièch Catar, Guilhèm de Belibasta, visquèt en aquelas tèrras, ont dirigiguèt aquela comunautat de fisèls, fins que foguèt empresonat amb de traïson, jutjat e, fin finala, executat a Vilaroja de Termenés l’an 1321.
Per conéisser la vida d’aquela darrièra comunautat de Catars es fòrça interessant lo libre “PÈIRE MAURIN. LO DARRIÈR PASTOR CATAR” (en catalan) escrich per JOSÉ LUÍS SOLER e WILFRIED BECK. A travèrs de las sieunas paginas podèm comprene tanben la vida quotidiana d’aquelas personas que foguèron perseguidas solament per pensar de manièra desparièra.
