LA CONSPIRACION D’ABRIL CONTRA LOS MEDICI

Francesc Sangar.- Lo jorn 26 d’Abril de 1478, una conspiracion pretenguèt acabar amb la dinastia dels Medici a Florença. Devèm enquadrar aquel atac, nomenat Conspiracion dels Pazzi o Conspiracion d’Abril, dins de luchas entre desparièras familhas pel contraròtle d’una de las vilas mai importantas (economicament e culturalament) de l’Euròpa del sègle XVen.

Los istorians an totjorn conformat que los instigadors d’aquel atac foguèron la familha dels Pazzi, rivals dels Medici, amb lo supòrt de divèrses aliats. Al començament, la tòca èra d‘assassinar los dos principals membres de la familha Medici, Lorenzo e Giuliano, pendent un esdejoar en lo sieu pròpri palai. Mas, quand sabèron que Giuliano seriá pas present, decidiguèron cambiar l’ataca per la celebracion de la messa de Pasca de la catedrala de Santa Maria dei Fiore.

Pendent l’Eucaristia, Bernardo Bandini Baroncelli e d’autres se sarrèron a Giuliano de Medici e clavèron de coltèls al sieu piech mentre Bandini cridava “la tiá ora, traïdor”. Posteriorament, los mètges comptabilizèron entre dotze e dètz-e-nòu feridas de coltèl. Lo meteis Bandini ataquèt e assassinèt tanben Francesco Nori, amic dels fraires Medici.

Lorenzo atenguèt se salvar de l’ataca pr’amor que se trobava a l’autre extrèm de la catedrala, en tot parlar amb de coneguts. Dos sacerdòts armats ataquèron Lorenzo e atenguèron lo ferir a l’esquina e al còl, mas Lorenzo poguèt se defendre e amb l’ajuda d‘amics amb qui parlava, se refugièt a la sacristia. Pendent aquela baralha, Francesco de Pazzi foguèt ferit en una camba.

Lo movement de l’arquevesque

L’arquevesque de Pisa, Francesco Salviati, qu’aviá ajudat en la conspiracion, partiguèt amb qualques soldats al Palai del Govèrn de Florença, per convéncer lo “gonfaloniero” de Justícia, que donèsse supòrt a l’ataca, mas la maximala autoritat de la vila refusèt d‘apiejar la conspiracion, del temps qu’atenhiá reténer l’arquevesque dins del palai.

Jacopo de Pazzi, en pensant que l’arquevesque aviá atengut sometre lo govèrn municipal, arribèt al Palai amb l’estonament de trobar lo palai barrat e ostil a las siás pretensions.

Amb tota aquela situacion, la confusion dominava a Florença e la rumor de la mòrt dels dos fraires Medici s’èra escampada per tota la vila. L’aparicion de Lorenzo Medici dispausat a venjar la mòrt del sieu fraire, e lo fracàs dels conspirators de l’assag de dominar lo Palai Municipal, provoquèt que la populacion se placèsse clarament amb los Medici, en cridant per las carrièras “Palle, Palle!!!” (Bòlas, qu’èra lo simbòl eraldic dels Medici).

Lorenzo de Medici comencèt la persecucion contra los conspirators. Los meteisses soldats qu’avián acompanhat l’arquevesque de Pisa foguèron lançats per las fenèstras del Palai Municipal, e los sieus còrses serián desmembrats. Pendent de jorns, qualqu‘unes amics dels conspirators moriguèron executats. Mas Lorenzo lo Magnific volguèt venjança contra los Pazzi amb la tòca de destrusir totalament aquel linhatge.

Los Pazzi subrevivents foguèron obligats a abandonar Florença e lor patrimòni foguèt confiscat. Jacopo e Francesco de Pazzi moriguèron executats, e lo còrs del primièr foguèt desenterrat, passejat per carrièras en la vila del còp que la populacion l’insultava en tot lo lançar, fin finala, al flume.

La Conspiracion d’Abril donèt a Lorenzo de Medici un grand poder politic a Florença, mas après morir, l’an 1492, aquel poder comencèt a desaparéisser. Dos ans après, a la nòva generacion dels Medici li calguèt abandonar la vila, e curiosament los Pazzi recuperèron lor patrimòni e lor prestigi; un jutjament declarèt que la conspiracion èra estada organizada pel ben de Florença. Paradòxas de l’istòria.