ES DESCOBÈRTA UNA PESCARIÁ MEDIEVALA PR’AMOR DE LA SECADA
Redaccion.- Malgrat que la secada actuala que patís Occitània tota e la rèsta de nacions europèas es brica positiva, tanben i a de còps que los eveniments climatics negatius tanben pòdon entraïnar de descobèrtas arqueologicas positivas. Aqueste es lo cas de la descobèrta d’una pescariá medievala situada a la riba esquerra del flume Loira. E la tròba – causala pr’amor del bas nivèl de l’aiga en aquel flume – poguèt èsser situada al sègle XIIen.
Per ansin, la pescariá foguèt estudiada per l’Institut de Recerca Arqueologica Preventiva francés (Inrap) lèu lèu aprés la siá descobèrta pels abitants del luòc. E foguèt confirmat que i aguèt una pescariá medievala, prèp de l’Illa de Poulas. De remembrar que la pescariá foguèt descobèrta aprés bassar lo nivèl de l’aiga del flume Loira en agost passat.
Una pescariá de salmons
Çò que trobèron los arqueològs franceses foguèt una sòrta de bastida de fusta en forma de W, creada per dirigir lo peissum dins cèrt luòc del flume. Laguens i aviá, a l’epòca, tota sòrta de trapas e de filats per pescar, mai que mai, de peisses que nadavan vèrs l’interior del flume, çò que podián èsser, segon los cercaires, de salmons.
Pels arqueològs cal situar l’epòca d’aquela nòva pescariá al sègle XIIen e, a mai de la pròpria pescariá, tanben i foguèron descobèrts divèrses bastiments, a mai d’una ròda de fusta que podiá èsser estada usada per copar de fusta. De remembrar qu’aquela part del flume Loira, al sègle XIIen, èra un pauc mai al sud del Loira actual.
Tot aquò arribèt aprés setmanas e benlèu de meses d’una secada òrra que la patís Euròpa entièra. Fòrça flumes an lo nivèl de l’aiga tras que bas e plan mai encara de rius que venguèron totalament secs pr’amor del meteis fenomèn. Lo flume Loira n’es nat excepcion e doncas es pr’amor d’aquò qu’ara òm descobrís cèrtas parts del flume secas e ont i pòdon demorar de luòcs arqueologics interessants. La còla de l’Inrap que trabalhèt en aquel siti usèt de radars per trapar d’anomalias al sòl e puèi explorèron lo siti mai prigondament. En d’autras parts del flume tanben descobriguèron rèstas de vaissèls dels sègle XVIIen e XVIIIen, enfonzats ailà benlèu per arrestar l’erosion de la riba del flume.
