DE VIKINGS AMERICANS FINS A L’AN 1021

CAM.- Lo darrièr estudi fach sus la preséncia dels vikings en de tèrras americanas confirmèt que los guerrièrs nordics demorèron ailà aumens fins a l’an 1021. Pasmens, la data qu’arribèron e fondèron la primièra colonia es encara sense confirmar de biais oficial pr’amor de la fauta de pròvas istoricas.

Per confirmar aquela data, una còla de scientifics analizèt los anèls de creissença de divèrses espleches de fusta ailà trapats e fachs de fusta d’arbres de la region ont desbarquèron los vikings aperaquí lo sègle Xen. La resulta ajudèt a afirmar que los coneguts coma vikings americans aurián demorat ailà, aumens fins a l’an 1021. La region estudiada per far aquel estudi foguèt Tèrranòva. Aquò vòl dire que los vikings se n’anèron – e cossí o perqué es pas encara estat confirmat scientificament – del continent american ara fa aperaquí 1.000 ans.

La fusta dels arbres analizats èran dins lo siti arqueologic de Tèrranòva, tanplan conegut uèi coma L’Anse aux Meadows, una peninsula situada en aquela província canadiana. Son d’arbres que foguèron copats en l’an 1021 e aquò auriá provocat la pensada dels aqueològs que foguèron copats pels vikings americans e qu’en l’an 1021 encara èran en aquel continent.

Aquel an doncas, 1021, pòt ja èsser considerat coma la data pus anciana de preséncia d’europèus confirmada en de tèrras americanas, plan abans de la celèbra e mal nomenada “descobèrta” d’America per Colomb en 1492 (pr’amor que los europèus descobriguèron pas res doncas ja èra un continent abitat per indigènas dempuèi fasiá milièrs d’annadas).

L’estudi foguèt realizat pels geològs Kuitems e Michael Dee e d’autres arqueològs e publicat al numeric Nature. De soslinhar que mai d’un istorian ja sospechava que los vikings èran demorats en aquel continent fins fa aperaquí 1.000 ans. Pasmens, caliá poder confirmar de manièra scientifica una data oficiala.

Un recèrca malaisida

D’autres còps, los scientifics avián pas podut confirmar cap data sus la preséncia dels vikings e lo maine qu’aurián agut en aquel continent al sègle Xen. Çò de meteis se debana amb un possible segond maine canadian ont los vikings tanben aurián demorat (Point Rosee), tanben situat en aquela region.

L’estudi actual estudièt divèrses espleches de fusta trapats en L’Anse aux Meadows, un siti que los arqueològs sonque comencèron a estudiar dempuèi la decada de 1960. Totes foguèron copats amb d’espleches de metal, un prètzfach qu’ajudèt los arqueològs a poder confirmar que foguèron copats per d’europèus e pas pels indigènas del luòc, pr’amor qu’en aquela epòca encara coneissián pas cap metal. Fins ara la data prepausada per d’istorians de l’arribada dels vikings a aquela region es l’an 993, mas es pas encara estada jamai confirmada istoricament. Totes los anèls de los espleches de fusta ailà trapats confirmèron la meteissa data finala; 1021.

Totun, los cercaires volguèron soslinhar que la data d’arribada dels vikings poguèt pas èsser confirmada pr’amor de fauta de pròvas istoricas. Aital, Vinland, la region canadiana ont los vikings demorèron al sègle Xen e fins a l’an 1021, demòra sens cap data d’arribada. De remembrar que Vinland es una region que las cronicas islandesas ja ne parlavan dempuèi lo sègle XIIIen, mas que los istorians avián pas considerat coma istorica fins fa pas gaire temps.