GEOFFREY D’ABLIS, INQUISIDOR DE CARCASSONA
Francesc Sangar.- Nascut a la vila francesa d’Ablis, Geoffrey, de l’òrdre dels fraires dominicans, venguèt inquisidor de Carcassona l’an 1303, en substituissent l’anterior Nicolas d’Abbeville. En aquel moment, existissiá un grand afrontament entre la “Santa” Inquisicion e los governants civils de vilas occitanas importantas coma Limós, Albi o la meteissa Carcassona, amb de revòltas constantas dempuèi los ans 1280. Èra encara fòrça present lo remembre dels efièches destructius de la Crosada contra los Catars d’unes decènnis endarrièr.
L’Inquisicion de Carcassona aviá una reputacion fòrça marrida, per la cruseltat dels sieus metòdes per interrogar los supausats colpables. Èran fòrça las personas qu’avián viscut de condicions inumanas e èran mòrtas dins del Mur, la preson ont èran barrats los supausats dissidents religioses. La Carcassona ont èra enviat Geoffrey d’Ablis èra una vila fòrça complicada de governar dempuèi lo domeni religiós e ideologic. E lo nòu inquisidor coneissiá perfièchament ont deviá atacar per contrarotlar la situacion e retornar lo monopòli religiós a la Glèisa Catolica.
La lucha contra los catars
Una de las principalas tòcas de Geoffrey d’Ablis èra justament contrarotlar la situacion per evitar la “renaissença” de l'”eretgia” catara e d’autras qu’apareissián tanben en lo panorama occitan. A Carcassona atenhiá un important nombre de seguidors lo predicador franciscan Bernat Deliciós, per la siá defensa de las classas pauras e dels oprimits e per las criticas contra l’ierarquia eclesiastica e los procediments de l’Inquisicion, e considerat tanben en qualqu‘unes domenis catolics coma eretic per las siás teorias dogmaticas.
Suls Bons Òmes, Geoffrey d’Ablis descobriguèt lèu que lo nuclèu principal de resisténcia catara èra ligat als seguidors dels fraires Autièr, Pèire e Guilhèm, e Jacme, filh del primièr, e originari del linhatge del Comtat de Fois. Los Autièr formavan una familha amb d‘amplas coneissenças intellectualas e culturalas, e amb bons contactes amb lo poder civil, sustot a Fois. Capturar e condemnar los Autièr foguèt una de las principalas tòcas de Geoffrey d’Ablis.
L’an 1305, l’inquisidor ordenèt d‘arrestar e d‘interrogar la majoritat de la populacion de la vila de Verdun, a l’actual departament de l’Aude, mas tanben posteriorament fòrça autras personas del Lauragués e de Tolosa e los sieus entorns, malgrat qu’aqueles darrièrs èran defòra de la siá jurisdiccion. Dependián de l’Inquisicion de la meteissa Tolosa, alavetz governada dempuèi l’an 1308 pel famós e temut Bernat Gui, mas la collaboracion entre ambedós inquisidors, lo carcassonés e lo tolosenc, èra constanta. Fin finala, lo sòn de Geoffrey d’Ablis d’acabar amb aquel nuclèu eretic foguèt una realitat e la familha Autièr moriguèt al lenhièr entre los ans 1309 e 1310. Après aqueles eveniments, los darrièrs ans del sieu govèrn inquisitorial foguèron relativament tranquils. Geoffrey d’Ablis moriguèt entre los ans 1316 e 1319 a Lion.
