GUILHÈM DE NOGARET, AL SERVICI DEL REI DE FRANÇA

Francesc Sangar.- Nasquèt a Sant Felitz de Lauragués l’an 1260, dins d’una familha que possedissiá una pichona proprietat a Nogaret. Atenguèt amb fòrça esfòrces estudiar Jurisprudéncia e trabalhèt, fin finala, coma professor de Drech Roman a l’Universitat de Montpelhièr (alavetz dins del Reialme de Malhòrca). Mercés al sieu prestigi dins del mond juridic, dintrèt l’an 1300 dins del Conselh del Rei (de França), amb la tòca d’intervenir sustot en lo domeni diplomatic, e residiguèt a París.

La siá importància proven de las siás intervencions en lo conflicte entre lo Papat e la monarquia francesa. Lo Papa Bonifaci VIIIn preteniá impausar la siá autoritat sus totes los monarcas europèus, e lo rei Felip IVn de França, “lo Bel”, s’i opausava totalament. La posicion de Guilhèm de Nogaret èra fòrça evidenta: Bonifaci VIIIn èra perjudicial als interèsses de la corona francesa, e un autre papa deviá ocupar la carga. Qualques estudioses defendon que prepausèt quitament al monarca francés sequestrar lo Papa e convocar un concili amb la tòca d’obligar Bonifaci a demissionar e escuélher un autre Papa favorable als interèsses franceses.

Fin finala, en una reünion fòrça tibada amb lo Papa a Roma, Guilhèm acusèt Bonifaci VIIIn de prejudiciar la siá pròpria familha amb de falsas acusacions de simpatizar amb d‘eretgias, concrètament d’èsser “patarins” (nom utilizat per definir los “catars” al nòrd de la Peninsula Italiana). Lo remembre de la Crosada contra los Albigeses èra encara fòrça recent dins las tèrras occitanas, ont Guilhèm èra nascut. Raimon de Nogaret, probablament lo pepin de Guilhèm, èra estat condemnat per “catar”.

Guilhèm amb l’ajuda dels Colonna, familha enemiga dels Gaetani (los parents del Papa Bonifaci) amassèt una pichona armada de mil cinc cents soldats e atenguèt d‘empresonar Bonifaci, mas una revòlta populara de partidaris del Papa, liberèt lo pontife roman. Mas aquela libertat foguèt seguida per la subta mòrt de Bonifaci VIIIn.

Un nòu Papa

Al brèu mandat del nòu Papa Beneset XIn, contunhèt lo de Clamenç Vn, fòrça mai favorable als interèsses de la monarquia francesa, e qu’autregèt l’an 1311 lo perdon a totes los ligats a l’assag de sequestracion de l’ancian Papa Bonifaci VIIIn. Lo meteis Guilhèm èra estat excomunicat dempuèi l’an 1304. Lo Papa Clamenç Vn foguèt lo primièr en establir la residéncia papala a Avinhon, en iniciant la lista dels coneguts coma “Papas d’Avinhon”. La relacion entre lo Papat e la monarquia francesa foguèt totala.

Guilhèm de Nogaret intervenguèt activament en d‘acusacions contra los cavalièrs templièrs, que condusiguèron a la detencion e l’assassinat de fòrça membres d’aquel òrdre lo jorn 13 d’Octòbre de 1307 a tot lo territòri del reialme de França.

Moriguèt empoisonat l’an 1313, segon divèrsas cronicas. Lo listat de possibles enemics que desiravan la siá mòrt èra ample, e los istorians discutisson encara sus l’autor d’aquel assassinat. Guilhèm de Nogaret es estat considerat coma un dels principals servents de la monarquia francesa de tota l’istòria.