LOP Ir d’AQUITÀNIA

CAM.- Lop Ir (tanben conegut amb los nòms de Lupus o Lupo) foguèt Duc de Gasconha e d’Aquitània aperaquí la decada de 670. Segon qualcunes cercaires auriá estat lo primièr d’una dinastia qu’arribariá fins a Lop IInd (769). Fòrça estudis confirman que foguèt lo filh de Felix, qu’auriá gaireben las meteissas frontièras territorialas e un estat aquitan tan grand coma l’estat del rei Caribèrt II.

I a pauca informacion sus los primièrs ans de vida de Lop I. Aperaquí l’an 658 se seriá rebellat contra Felix e ne seriá vengut l’ereitièr. Lop I s’alièt amb lo duc Paulus, gòt, qu’aviá protagonizat la revòlta dels territòris de Septimània e Catalonha contra lo rei gòt ispanic Wamba. Aquò passèt en l’an 673. Alara Lop I aviá las vilas de Tolosa e Bordèus e ataquèt Bezièrs.

A l’Istòria de Wamba, de Julian de Toledo, Lop es considerat coma un prince (princeps) e aquò fa pensar que, benlèu, aviá o aguèt familha reiala. Tre los ans 673 e 675 Lop I convoquèt un concili de Bordèus. Dempuèi alavetz foguèt nomenat duc e aquò fa pensar que foguèt un vassal del rei Childeric II. L’an 675, pasmens, assagèt d’espandir las frontièras geograficas e politicas d’Aquitània en tot atacar Lemòtges. Mas foguèt assassinat. Benlèu pr’amor que, segon ditz lo tèxt Los Miracles de Saint Marcial, aviá la tòca de se coronar rei d’Aquitània (in sedem regam se adstare).

Un duc basco

Segon qualcunes cercaires, la sieuna origina foguèt basca. La vertat es que la lista de ducs aquitans es encara plan desconeguda. Se coneis que Aichinà foguèt duc tre los ans 627 e 645 quora i aguèt una nòva revòlta bascona.  Una part de Gasconha e del País Basco venguèron desseparats e la rèsta del territòri aquitan auriá demorat contrarotlat pel duc d’Aquitània.

Un duc conegut es Felix d’Aquitània e Lop ne seriá estat l’ereitièr en 670. D’autors coma Devic e Vaisette considèran que foguèt duc sonque d’Albigés, Carcin, Velai e Gavaldan. Lo nòm de Lop I es nomenat al concili de la glèisa de Bordèus de l’an 673. Un Lop ataca Bezièrs lo meteis an. Mas quora Lop I sabèt que lo pròpri rei gòt Wamba èra a mand de l’atacar en Bezièrs se n’anèt vèrs las montanhas e luchèt pas contra los gòts.

Puèi, e pr’amor de la guèrra civila que i aguèt al nòrd francés, fòrça aristocratas se n’anèron vèrs Aquitània ont foguèron puèi dirigits per Lop I per atacar lo nòrd. Aquitània venguèt, d’efièch, un territòri independent. Al libre Miracula Martialis Lop I contunhèt la lucha contra lo nòrd francés e foguèt nafrat, fin finala, en lemòtges l’an 676. Es brica segur que moriguèsse lo meteis an. Lo sieu successor foguèt Bertrand I d’Aquitània.

Segon l’istoriografia basca Lop I foguèt Duc d’Aquitània tre los ans 670 e 710. L’independéncia d’efièch dels aquitans per rapòrt al nòrd francés se seriá debanada aperaquí la decada de 660, car aprés l’an 657 i a pas pus nomenaments d’evesques en Tolosa dempuèi lo nòrd. Los Miracles de Saint Marcial confirman que Lop I dirigissiá lo “marrit pòble basco”. Septimània se revoltarà en l’an 672 amb l’aliança dels bascos e de Lop I.

Lop I auriá governat los ducats de Gasconha e d’Aquitània sens poder fugir los events contemporanèus regionals de la siá epòca e quora i aguèt una guèrra civila, al nòrd, en defòra de la sieunas frontièras, assagèt de s’espandir en tot atacar Lemòtges.

Un còp ailà, Lop I auriá exigit als nòbles de Lemòtges lo sieu jurament coma vassals e l’exili de l’avesque de la vila. La meteissa fònt ditz que Lop I auriá arribat a Saint Marcial l’an 680 aprés abandonar Lemòtges, que poguèt pas conquistar amb un sètge. La patz, totun, arribariá pas fins a l’an 681. Encara en l’an 688, Pipin d’Heristal, majordòm de la cort franca del nòrd, dirigiguèt una ataca contra Aquitània, que demorèt, totun, independenta. Lo tèxt afirma que foguèt seguit al tron per Odon lo Grand l’an 710, quan Lop I aviá ja 68 ans.