CATARISME A ORTA DE SANT JOAN
Francesc Sangar.- Nòva jornada, amb fòrça preséncia d’assistents, consacrada a la memòria istorica dels Bons Òmes e las Bonas Femnas, los Catars. Aquel còp a l’Ecomusèu dels Pòrts, a Orta de Sant Joan, a la comarca catalana de la Tèrra Nauta (Terra Alta), a Catalonha, lo passat dissabte 7 d’Octòbre de 2023.
Après la presentacion de la jornada realizada per la conselhièra d’Ensenhament, Cultura e Torisme de la Comuna, Marta Prat Aubach, lo jornalista e escrivan Víctor Amela legiguèt qualques fragments del sieu roman de succès “Lo Catar Imperfècte”, adaptats a Orta de Sant Joan e la comarca.
Aprés, José Luís Soler, de l’Associacion culturala “Camins dels Catars” que reivindica davant lo Conselh d’Euròpa lo projècte d’Itinerari Cultural que jonheriá lo Maestrat valencian amb la mitica montanha occitana de Montsegur, expliquèt tanben l’importància del Catarisme dins aquelas tèrras catalanas pendent los sègles XIII e XIV.
Un fragment del film “Bogre. La granda eretgia europèa” sus la persecucion e la repression contra los Bons Òmes e las Bonas Femnas, del director piemontés Fredo Valla, foguèt fòrça util per comprene la tragèdia de l’intolerància que patiguèron los malastrosament nomenats e considerats “eretges” pendent aquela epòca.
Una region amb de catars
Divèrses estudis demòstran que la Plana de Lhèida e las Tèrras Catalanas de l’Ebre, e tanben lo Maestrat valencian foguèron lo destin de fòrça familhas perseguidas pendent la Crosada contra los Catars a las tèrras occitanas. Aquela immigracion cambièt la demografia, la cultura e l’istòria d’aquelas comarcas.
Jol mandat de l’avesque Paholac de Tortosa e per òrdre del Papat e del rei Jacme II de la Corona d’Aragon, la “Santa” Inquisicion comencèt una enquista per conéisser las dimensions de la preséncia d'”eretges” al sud de Catalonha. Malgrat l’evidenta preséncia de Bons Òmes e Bonas Femnas al territòri, l’informe atenguèt pas de pròvas definitivas. Sonque, coma exemple, Lhèida èra estada qualificada coma “un nin d’eretges”. Mas lo rapòrt escrich a la diocèsi tortosenca reconeissèt sonque lo comportament immoral de qualqu’unes sacerdòts catolics, sustot per la relacion especiala amb qualq’una femna de lors parròquias. E lèu mai de jornadas de recuperacion istorica del Catarisme contunharàn de completar una vision fòrça entièra d’aquel capítol de nòstra istòria.
