LO COMENÇAMENT DE LA PRIMA
CAM.- Ara fa 1000 ans nasquèt Guo Chi, que seriá puèi considerat coma un dels pintors pus importants de la pintura medievala chinesa. D’efièch, Guo Chi (1020-1090) foguèt, a mai de pintor, un teoric de la pintura, e l’energia que volguèt transmetre dins los sieus quadres demorariá pendent de sègles en tot influir diferentas escòlas posterioras de pintura chinesa. Son art es classat uèi coma un dels pus bèls d’aquel país e epòca e tanben de la planeta tota.
Los primièrs ans de Guo Chi son fòrça desconeguts. Nasquèt en la província de Henan e demorèt fòrça annadas en la còrt imperiala dels Song del Nòrd. Uèi i a plusors pinturas que demòran e son consideradas coma de vertadièrs tresaurs de l’art chinés medieval. A mai d’aquelas pinturas, daissèt un libre teoric sus cossí caliá pintar ; “Lo Naut Messatge de las Forèsts e los Flumes”. Sa manièra de pintar foguèt pas tan nòva mas un desvolopament de la pintura tradicionala chinesa. Pasmens, la siá tecnica es coneguda uèi coma revolucionària pr’amor que foguèt plan originala: en Occident encara passarián plusors sègles abans de poder pintar d’aquel biais.
Pintor de paisatges
Protegit per l’emperaire, lo sieu trabalh se centrèt, mai que mai, en de pinturas sul paisatge amb fins a tres linhas desvolopadas segon la prigondor del quite paisatge. Aquela tecnica, fòrça nòva a l’epòca, es nomenada Perspectiva Flotanta o Angle de la Totalitat e amb aquela Guo Chi volguèt donar una vision estonanta amb un detalh tras qu’ordinàri e ont l’òme, mai pròche, es al costat dels arbres, pus grands. Al fons del quadre, i a totjorn la montanha, coma un prigond pònt demest la tèrra e lo cel.
Guo Chi formèt part d’un grop d’artistas de l’epòca que trabalhèron plusors arts, la calligrafia mas tanben la poesia e la pintura. Foguèt l’Academia Hanin, plan coneguda a l’epòca e que daissèt una influéncia prigonda en l’art posterior chinés. Amb la pintura aquò que se passèt a travèrs de Guo Chi.
Una de las pinturas pus celèbras de Guo Chi “Lo començament de la Prima” daissèt, a mai d’un paisatge, una prigonda relacion entre l’òme e la natura cossí voliá transmetre lo vejaire taoista de l’epòca. Lo naturalisme e realisme a l’encòp, foguèron doncas de caracteristicas personalas de la pintura de Guo Chi.
Malurosament quand l’emperaire que protegissiá Guo Chi moriguèt, se debanèt una revolucion artistica e filosofica tradicionalista e fòrça pinturas de Guo Chi foguèron consideradas coma marridas pr’amor de la siá tecnica nòva, avançada a l’epòca que visquèt. E foguèron perdudas. Un exemple mai que l’epòca medievala foguèt a l’encòp una epòca de desvolopament cultural prigond mas tanben de fauta de compreneson de las avançadas mentalas que s’i produsián.
