CATARISME A LA SÉNIA
Francesc Sangar.- I aguèt una granda participacion de public en las activitats ligadas a la recuperacion de la memòria dels Bons Òmes e las Bonas Femnas a la vila de la Sénia, a la comarca catalana del Montsià, pendent los jorns 2 e 3 de Decembre. Totas aquelas activitats gaudiguèron del supòrt de la meteissa Comuna e d’associacions coma Ilercavònia, Camins dels Catars, o El Món Medieval.
L’acte comencèt amb divèrsas conferéncias interessantas. La primièra de José Luís Soler de l’entrepresa Servitur, expliquèt l’importància del projècte de Camins dels Catars, que dempuèi las tèrras del Maestrat valencian fins a la mitica montanha de Montsegur, vòl crear un camin Cultural Europèu amb lo supòrt del Conselh d’Euròpa. Aprés, Eduard Berga, director del Centre d’Estudis Catars de Barcelona, remembrèt la preséncia del Catarisme a las Tèrras Catalanas de l’Ebre.
Tradicionalament, èra totjorn supausat que la màger preséncia de Bons Òmes e de Bonas Femnas en Catalonha èra situada a las comarcas pirenencas per lor proximitat amb las tèrras occitanas. Mas sabèm uèi qu’existiguèron d’importantas comunitats cataras a la Plana de Lhèida e a las Tèrras de l’Ebre, coma tanben al nòrd valencian.
Lo Camin dels Catars
Fin finala, l’estudiós del Catarisme Sergi Grau Torras presentèt lo sieu darrièr libre, “Cinquanta endrechs del Catarisme occitanocatalan”, ont recor d’interessants endrechs de Catalonha, Occitània e lo territòri valencian ont coneissèm qu’existiguèt una importanta preséncia de Catars.
Pendent la serada, foguèt projectat lo film “Bogre. La granda eretgia europèa” del director piemontés Fredo Valla, una granda produccion sus l’existéncia de comunitats cataras a divèrses païses europèus. Un atractiu del film es l’utilizacion de las meteissas lengas dels investigadors entrevistats, entre elas l’occitan.
Un concèrt de poesia culminèt una excursion pels paratges pròches a La Sénia. L’escrivana Conxita Jiménez, acompanhada per d’autres poètas locals, recitèron de poèmas ligats a la memòria istorica del Catarisme. Los assistents poguèron gaudir de la qualitat de l’òli de la vila, amb un tast facilitat per la Cooperativa Terram.
A la Plaça de la Patz de La Sénia foguèt plantat un laurièr, coma simbòl de la patz e de la libertat, e coma memòria dels Bons Òmes e las Bonas Femnas. Fin finala, a l’Ostal de la Cultura, Arturo Gaya amb l’ajuda a la guitarra per Sergi Trenzano, interpretèt musicalament de divèrses poèmas d’escrivans del territòri e d’autres de fòrça coneguts. Una nòva oportunitat per remembrar aquel capítol de la nòstra istòria.
